今日香港教育大崩壞，除了有人大大力洗腦，為人父母都責無旁貸啦。

首先，港式父母都有個錯誤觀念，不問因由，總之為細路犧牲，就覺得自己好偉大。不過，他們犧牲的，通常是自己美學標準，之後就是常理；甚至自己本性。所以，你會見到幾多俊男美女，為人父母之後，就核核突突。最經典是在家中放一張醜到地心深處的膠地蓆。你我當時年紀小，邊個唔係跌到大？邊個未穿過頭流蚊飯？之後返學更大鑊，超肉酸書包、醜死怪返學鞋，只要巧立名目話對細路發育好，港式父母都會合埋眼乖乖進貢血汗錢。之後再在細到死空間，塞多一個「姐姐」及一大堆核突塑膠兒童家具。在這種環境成長，陪養到品味細路確係神蹟。跌入核突輪迴，萬劫不復。

所以，我們揭《Milk Magazine》（法國版本！），見到細路跟大人品味可以無縫交接，活得漂亮。這班漂亮父母有型細路，對於我們來說，簡直係外星人。設計師Andrea Marcante及Adelaide Testa，剛剛跟這本外星雜誌合作推出兒童家具。系列叫COSE DA BOCIA，有床有檯有層架有衣櫃有吊燈。悉數家具材料上只用eco-friendly的物料，謝絕塑膠。外觀上，則盡收二十至七十年代的美學養份，睇落好復古好漂亮。不過整個COSE DA BOCIA系列，有個重要的設計要旨：就是作為兒童家具，為甚麼要跟大人世界分隔？是不是我們都被洗腦，一定要裝可愛扮cuite才是兒童家具？為甚麼現代兒童要被裝扮到似釋迦牟尼樂園裡的人物？卻不可以跟漂亮父母一樣低調又有型？正如你看舊照片裡面的童裝，分別只是尺碼，設計上根本同當時的俊男美女衣裝飾沒有分別。

所以，這批家具沒有肉麻扮有趣的假天真，只有純粹的漂亮。大人細路都想要。