《無涯：杜琪峯的電影世界》散場後我問自己：我是否杜琪峯fans？
諗來諗去，不算是，原因如下：1.我沒有睇晒所有杜Sir作品；2.尤其他的愛情片（即《乜乜乜之戀》及《乜乜男女》之類），我一向敬而遠之；3.就連《嚦咕嚦咕新年財》我都冇睇（因為我完全唔識打牌）。

但他多部戲我又真的翻炒咗N次，而且相信會持續翻炒，翻炒到我與世長辭嗰日。
以下是我持續翻炒的杜Sir電影，排名可能有少少分先後。

《暗戰》系列：《1》好睇啲定《2》好睇啲？我冇嚴格比較過。《1》精采在於描述一個男人，執著於怎樣在生命走到盡頭的時候設下連環布局報復，《2》精采在用執著於贏的持續大輸家林雪，同你講放開才是正道。但無論《1》定《2》，最好睇的都是劉青雲。冇咗佢，我肯定唔會咁執著地翻炒落去。

《暗花》：OK，杜Sir只是監製，但點睇，成齣戲都擺明貫徹著杜琪峯意志吧。當日單拖在沙田娛樂城的戲院（已執，改建成教會）睇，全場數埋十個人都冇——冇錯，那是香港電影最壞的年代，但就在那最壞的年代，杜Sir讓我欣賞到一齣澳門回歸前腥風血雨下兩個男人的宿命故事。而宿命，一直是由一個無人觸碰得到的權力所遙控。

《兩個只能活一個》：OK，杜Sir也是監製，但同樣貫徹著他的意志。一男一女，同是天涯最淪落的人，同樣在找一個生存下去的機會，和希望。電影上映年份，1997年。（好可惜，這齣戲我冇機會再翻炒，因為我隻VCD唔知借咗俾邊個，而阿邊個又一直冇還碟，頂。）

全文請參閱149期《JET》。