寫這一篇的晚上，《Batman v Superman: Dawn of Justice》啱啱公開了第一段teaser，感覺就好似要趕在《Avengers: Age of Ultron》上映前，截糊，攞個彩先。

問心，我好憎睇賓艾乏力做Batman（因為我好憎睇賓艾乏力做戲），但可以肯定，出年齣戲上映時我咪又係仆去睇……

過去的我真的超鍾意睇superhero電影，但而家，我唔敢話自己鍾意——過去，superhero電影要等上好幾年先等到一齣；而家，一年已經有好幾齣。當（荷里活拍）英雄已成習慣，我也只能說，入場睇superhero film不過是習慣囉。

但我的確佩服Marvel Studios。冇佢哋的周詳部署，我真的冇諗過會睇到Avengers有機會聚首一堂，以及《Civil War》（這個堪稱近年美國漫畫最精采的故事）真的能夠被拍出來，讓Iron Man同Captain America在大銀幕隻揪……

全靠個頭開得好。2008年，世人最期待的英雄電影肯定是Nolan的《The Dark Knight》——對一般不熟悉美國漫畫的觀眾，他們肯定識Batman多過Iron Man，畢竟Batman多年來拍過電視劇又拍過戲，真的家傳戶曉（不像Iron Man，真的有朋友問過我：邊個嚟？）。Nolan同時示範了一種英雄電影的新處理手法：先參考漫畫文本保留原著精神（滿足hardcore漫畫迷），卻又塞入一些對現代社會的指涉，把大家都識的英雄故事當成作者電影咁拍（來滿足自己），而同時必須保持高度娛樂性拍成blockbuster（滿足一般觀眾和電影公司）。但成件事太獨一無二太Nolan了，結果，三部曲完咗Christian Bale都話夠皮了，一切就要完，冇可能交由阿豬阿狗去承接。

Marvel Studios一開始便不走這種套路。每齣電影都幾乎找不同導演，風格或許因人而異，但大前提是絕對不能踰越一早定落的plan，因為每一齣電影都只是一個龐大系列的一小部分（很像美國漫畫公司的處理手法，對旗下每一本漫畫每一個英雄都實行高度「監控」）。像《Iron Man》，是好睇的，但拍得好睇是一回事，重點始終是開個靚頭，用最簡單俐落方法介紹Tony Stark / Iron Man，為之後一系列電影鋪路。

由《Iron Man》開波，到舊年的《Guardians of the Galaxy》，合共10部戲，每一部都收得，但不是每一部都稱得上好睇。最唔好睇是《Thor》，一切太理所當然（地悶），以致我至今都冇睇第二集《Thor: The Dark World》，唯一成功是爆出了Tom Hiddleston的Loki，他為這奸角交出了不樣板的演出。

全文請參閱153期《JET》。